പ്രവാസജീവിതം എട്ടു മാസം പിന്നിട്ടപ്പോള്‍

അതെ, ഞാന്‍ സൌദിയില്‍ വന്നിട്ട് എട്ടു മാസം കഴിഞ്ഞു.കഴിഞ്ഞ ഡിസംബര്‍ 30നു അധികം ആരെയും അറിയിക്കാതെ ആയിരുന്നു റിയാദിലെക്ക് വണ്ടി കയറിയത്.(അതിനെകുറിച്ച് പിന്നെ പറയുന്നതാണ്).ഇവിടെകഴിഞ്ഞു പോയ എട്ടു മാസകാലത്തെ പ്രധാനമായും രണ്ടു മൂന്നു ഘട്ടങ്ങളായി വിഭജിക്കാവുന്നതാണ്.ഒന്നാമതായി ,ഇഖാമ കിട്ടുന്നത് കാത്തിരുന്ന കാലം ഉള്‍പ്പെടെ , അളിയന്‍ നാട്ടിലേക്ക് പോയ ഏപ്രില്‍ 15 വരെയുള്ള മൂന്നരമാസം.അളിയന്‍ നാട്ടില്‍ പോയപ്പോള്‍ യാസറിന്‍റെ കൂടെ ആയിരുന്നു താമസം.അങ്ങനെ ആ ആഴ്ച തന്നെ മക്കയിലേക്ക് ഉംറക്ക് പോകുകയും ആ കൂട്ടത്തില്‍ മദീന സന്ദര്‍ശിക്കുകയും ചെയ്തു.തിരിച്ചുവന്ന്‍ പിറ്റേന്ന് തന്നെ ഒരു ജോലിക്ക് വേണ്ടി അഭിമുഖത്തില്‍ പങ്കെടുക്കുകയും അടുത്ത ദിവസം തന്നെ ദമാം- ഖോബാറിലെക്ക് പുറപ്പെടുകയും ചെയ്തു.അങ്ങനെ ഏപ്രില്‍ 26നു ജോലിയില്‍ പ്രവേശിച്ചു,അവിടെ രണ്ടാംഘട്ടം ആരംഭിക്കുന്നു.

ഈ ഒന്നാംഘട്ടം, റിയാദിലെ അക്കാലത്തെ തണുപ്പും യാസറിനും അബൂതാഹിറിനും കൂടെ ഒരാഴ്ച്ചയാണെങ്കിലും ഉള്ള താമസവുമൊക്കെ തന്നെഎന്നെ സംബന്ധിച്ചിടത്തോളം വളരെ അവിസ്മരനീയമായിരുന്നു.പിന്നെ ആദ്യമായിട്ടുള്ള എന്‍റെ ഉംറയും.എന്‍റെ മാതാപിതാക്കള്‍ക്കൊന്നും തന്നെ ഇത് വരെ ഇതിനു ഭാഗ്യം ലഭിച്ചിട്ടില്ല എന്നത് , ഞാന്‍ അത്രമാത്രം ഭാഗ്യവാനാണെന്നത് എന്നെ ബോദ്യപ്പെടുത്തുന്നു.

ഖോബാറിലുണ്ടായിരുന്ന 50 ദിവസം, കോര്‍ണിഷിലും ലുലു ഹൈപെര്‍ മാര്‍കെറ്റിലും തന്നെ ആയിരുന്നു എന്ന് പറഞ്ഞാല്‍ ഒരിക്കലും തെറ്റാകുകയില്ല.ഒരാഴ്ചയില്‍ മൂന്നു തവണ എങ്കിലും ലുലുവില്‍ പോയിരുന്നു.ജോലിയുടെ അവസ്ഥയാണെങ്കില്‍ അസീസിയ മുതല്‍ ഖത്തീഫിലെ മജീദിയ വരെ യാത്ര തന്നെ.അങ്ങനെ ദമാം-ഖോബാര്‍ ഹൈവേയും ദമാം-ജുബൈല്‍ ഹൈവേയും ഖോബാര്‍-ദഹരാന്‍ -ഇന്‍ഡസ്ട്രിയല്‍ സിറ്റി 2 ഉം ഒക്കെ നല്ല പരിചയമായി.അങ്ങനെ ഇരിക്കെയാണ് ദമാമില്‍ നിന്ന് ജിദ്ധയിലേക്ക് മാറ്റം വന്നത്.ജൂണ്‍ 13 നു ദമാം വിടുകയും 18 നു ജിദ്ധയില്‍ തിരിച്ചു കയറുകയും ചെയ്തു.അതിനിടയില്‍ പറയണ്ടല്ലോ ,റിയാദിലെ 'ഇടത്താവളത്തില്‍' ഒന്ന് സന്ദര്‍ശിച്ചു.

അങ്ങനെ ജൂണ്‍ 17 നു രാത്രി ഞാന്‍ ജിദ്ധയില്‍ എത്തിച്ചേര്‍ന്നു.ജോലിയെ കുറിച്ച് പറയുകയാണെങ്കില്‍ ജിദ്ധയിലെ ചില സ്റ്റെഷനുകളും പിന്നെ കുറച്ചു മക്കയിലും ,അതായിരുന്നു അവിടുത്തെ സ്ഥിതി.നമ്മുടെ ഇബ്രാഹീമും ഞാനും മിക്കാവാറും എല്ലാ വെള്ളിയാഴ്ചയും ഒത്തുകൂടും.മാത്രമല്ല മക്ക അവിടുന്ന് 10 റിയാല്‍ അകലം മാത്രം.അതുകൊണ്ട് ജിദ്ധ എനിക്ക് വളരെ പ്രിയപ്പെട്ടതായി.എന്നാല്‍ ജിദ്ധയും 53 ദിവസങ്ങള്‍ക്ക് ശേഷം വിടേണ്ടി വന്നു.അങ്ങനെ അല്‍ബേകിന്‍റെ നാട്ടില്‍ നിന്നും ആഗസ്റ്റ് 9(റമളാന്‍ ) നു ,റിയാദിലേക്ക് പുറപ്പെട്ടു.

അന്ന് (റമളാന്‍ 10 ) മുതല്‍ ഇതുവരെ , പെങ്ങളുടെ കൂടെയാണിവിടെ താമസം.അങ്ങനെ റിയാദില്‍ ഇപ്രാവശ്യത്തെ എന്‍റെ നോമ്പും പെരുന്നാളും കഴിഞ്ഞു പോയി.പറഞ്ഞു വന്നപ്പോള്‍ എന്‍റെ പ്രവാസജീവിതത്തിന്‍റെ ആദ്യ എട്ടു മാസം കൊണ്ട് തന്നെ സൌദിയിലെ പ്രധാനനഗരങ്ങളായ ദാമാമിലും റിയാദിലും ജിദ്ധയിലും ചെറുതല്ലാത്ത ദിവസങ്ങളില്‍ താമസിക്കാന്‍ കഴിഞ്ഞു.